Toshkentda gaz bosimi pasaydi: Energetika vazirligi aholidan uzr so‘radi
Toshkentda 14-noyabr kuni gaz bosimi pasaydi. Energetika vazirligi bosim oshirilganini, ta’minot 2–3 soatda me’yorga kelishini bildirdi.
· 1 daqiqa o‘qish

14-noyabr, shanba kuni poytaxt aholisi tabiiy gaz bosimi keskin tushib ketganidan shikoyat qildi. Murojaatlar shaharning turli tumanlaridan kelib tushdi.
Toshkent shahar kommunal dispetcherlik xizmati soat 17:47 da holatga izoh berdi. Xizmatga ko‘ra, ayrim hududlardagi muammo magistral quvurlardan kelayotgan gaz bosimi pastligi bilan bog‘liq.
Soat 18:55 da Energetika vazirligi bayonot tarqatdi. Unda aytilishicha, poytaxtga gaz yetkazib beruvchi quvurlarning kirish nuqtalarida bosim oshirilgan, taqsimlash tarmoqlarida esa u 2–3 soat davomida bosqichma-bosqich ko‘tariladi.
Vazirlik aholidan gaz jihozlaridan ehtiyotkorlik bilan foydalanishni, ularning sozligini tekshirishni va xavfsizlik qoidalariga rioya qilishni so‘radi. Shuningdek, yuzaga kelgan noqulayliklar uchun uzr so‘radi.
Bosim nima sababdan pasaygani vazirlik bayonotida ochiqlanmagan. Qancha xonadon gazsiz qolgani haqida rasmiy raqamlar ham e’lon qilinmadi.


