AQSH Xitoy, Rossiya va Eron uchun AI chiplariga masofaviy kirishni cheklaydi
AI chiplari bo‘yicha AQSH yangi qoida chiqardi: xorijdagi data-markazlar Xitoy, Rossiya va Eron kompaniyalariga katta hisoblash quvvati berishda cheklanadi.
· 1 daqiqa o‘qish

AQSH Savdo vazirligining Sanoat va xavfsizlik byurosi (BIS) ilg‘or sun’iy intellekt chiplari va serverlariga masofadan kirishni tartibga soluvchi vaqtinchalik yakuniy qoidani e’lon qildi. Hujjat 16-noyabr kuni byuro saytida chop etildi.
Byuro bayonotiga ko‘ra, qoida mavjud eksport cheklovlarini uchinchi davlatlardagi data-markazlar orqali chetlab o‘tishning oldini olishga qaratilgan. Endi masofaviy kirish ham chiplarni jismoniy yetkazib berish bilan bir xil nazoratga tushadi.
Nashrlar xabariga ko‘ra, xorijdagi data-markazlar mijozlarini tekshirishi shart bo‘ladi. Xitoy, Rossiya va Eronda bosh qarorgohi joylashgan kompaniyalarga katta hajmdagi hisoblash quvvatini taqdim etish cheklanadi.
Shuningdek, Indoneziya, Malayziya, Singapur, Tailand va Braziliyada joylashgan kompaniyalarga ilg‘or chiplarni eksport qilish uchun litsenziya talab etiladi. Ma’muriyat bu davlatlarda kontrabanda xavfi yuqoriroq deb hisoblaydi.
Euronews ma’lumotiga ko‘ra, qoida 90 kundan keyin kuchga kiradi.
Ommaviy axborot vositalari Xitoy kompaniyalari Janubi-Sharqiy Osiyodagi data-markazlardan Nvidia’ning eng kuchli chiplarini ijaraga olib, mavjud taqiqni chetlab o‘tgani haqida xabar bergan edi.
Qaror Donald Trampning Xitoyga safari va Si Szinpin bilan uchrashuvi arafasida qabul qilindi.


