Erdo‘g‘on G‘azo uchun musulmonlarni birdamlikka chaqirdi
Turkiya prezidenti Rajab Toyyib Erdo‘g‘on musulmon davlatlarini G‘azoga insonparvarlik yordamini yetkazish va Isroilga bosimni kuchaytirish bo‘yicha faolroq harakat qilishga chaqirdi.
· 1 daqiqa o‘qish

Uning aytishicha, ayniqsa, qish fasli yaqinlashayotgani sharoitida boshpanasiz qolgan falastinliklarning ahvoli yanada og‘irlashmoqda. Sovuq ob-havo, oziq-ovqat va zaruriy vositalar yetishmasligi, shuningdek, boshpanalarning yo‘qligi bolalar va boshqa aholining hayotiga jiddiy xavf tug‘dirmoqda.
Erdo‘g‘on musulmon davlatlari bu vaziyatda faqat xalqaro hamjamiyatning harakatlarini kutib o‘tirmasligi kerakligini bildirdi. Uning fikricha, Isroilga nisbatan bosimni kuchaytirish va G‘azoga insonparvarlik yordami yetkazish bo‘yicha amaliy choralarni ko‘rish zarur.
«Boshqalarga tayanib qolmasdan, biz, musulmonlar, harakat qilishimiz va Isroilga bosimni oshirishimiz kerak. Islom olami qattiq qish sovuqlari tushishidan oldin G‘azoga ko‘proq gumanitar yordam yetkazish bo‘yicha harakatlarini kuchaytirishi lozim», — dedi Turkiya prezidenti.
Erdo‘g‘onning ta’kidlashicha, G‘azodagi tinch aholini qo‘llab-quvvatlash va ularga zarur yordamni yetkazish xalqaro hamjamiyatning asosiy vazifalaridan biri bo‘lib qolishi kerak.


