Haydovchilar uchun yangi tartib tasdiqlandi
O‘zbekistonda yo‘l harakati qoidabuzarliklari bo‘yicha ma’muriy ishlarni rasmiylashtirish tartibi yangilandi. Haydovchilardan jarimani joyida undirish taqiqlanadi. Yangi tartib 2027-yil 7-yanvardan kuchga kiradi.
· 1 daqiqa o‘qish

O‘zbekistonda haydovchilar uchun jarimalarni rasmiylashtirish va undirish tartibi o‘zgarmoqda. Bu haqda Ichki ishlar vazirining 2026-yil 4-sentabrdagi 502-son buyrug‘ida belgilangan. Yangi tartibga ko‘ra, ma’muriy bayonnomalar YHXXning elektron tizimi orqali rasmiylashtiriladi.
Haydovchilar, guvohlar va boshqa ishtirokchilar elektron bayonnomalarni elektron imzo yoki barmoq izi orqali tasdiqlashi mumkin.
Shuningdek, YHXX xodimlariga qoidabuzarlardan jarimani hodisa joyining o‘zida undirish qat’iyan taqiqlanadi. To‘lovlar elektron to‘lov tizimlari, mobil ilovalar yoki bank kassalari orqali amalga oshiriladi.
Haydovchilar ma’muriy jarima to‘g‘risidagi qaror nusxasini olgan kundan boshlab 10 kun ichida yuqori turuvchi organ yoki sudga shikoyat qilish huquqiga ega.
Agar jarima qaror chiqarilgan kundan boshlab 60 kun ichida to‘lanmasa, transport vositasini ushlab turish chorasi qo‘llanishi mumkin. Yangi tartib 2027-yil 7-yanvardan kuchga kiradi.


