Prezident Yangi Toshkentdagi investitsiya loyihalarini kunlik nazoratga oldi
Yangi Toshkent va “Yashil makon”: prezident har bir loyihani kunlik nazorat qilishni topshirdi, bahorda ekilgan ko‘chatlarning uchdan biri qurigan.
· 1 daqiqa o‘qish

Prezident Shavkat Mirziyoyev 18-noyabr kuni Yangi Toshkent qurilishini jadallashtirish va “Yashil makon” umummilliy loyihasi samaradorligini oshirish masalalari bo‘yicha yig‘ilish o‘tkazdi.
Yig‘ilishda Yangi Toshkentdagi har bir investitsiya loyihasi kunlik manzilli nazoratga olinishi belgilandi. Qurilish maydonlarini tayyorlash Yangi Toshkent direksiyasi orqali markazlashgan tarzda amalga oshiriladi.
Obyektlar foydalanishga topshirilgunga qadar elektr, suv, issiqlik, kanalizatsiya va yo‘llar tayyor bo‘lishi talab qilindi. Hududlarga ajratilgan uchastkalarda faqat uy-joy emas, biznes markazlari, mehmonxonalar, maktab, tibbiyot va sport obyektlari ham barpo etilishi kerak.
Barcha loyihalar yagona arxitektura konsepsiyasi va “yashil” qurilish talablariga mos bo‘lishi lozim. OAV xabariga ko‘ra, o‘tgan hafta qabul qilingan farmon bilan bu yerdagi yirik investorlar uchun qo‘shimcha soliq imtiyozlari joriy etilgan.
“Yashil makon” bo‘yicha kuzgi ko‘chat ekish 8-noyabrda boshlangan, biroq Toshkent, Samarqand va Jizzax viloyatlarida ortda qolish kuzatilmoqda. Bahorda ekilgan ko‘chatlarning qariyb uchdan biri qurigani va soxta hisobotlar holatlari tanqid qilindi.
Bu yil ekilgan ko‘chatlarning kamida 90–95 foizi ko‘karishi hamda har bir mahallada bir aholiga kamida uchta daraxt to‘g‘ri kelishi vazifa qilib qo‘yildi.


